លោក ដូណាល់ ត្រាំ ប្រកាសដាក់ប្រទេសក្នុងភាពអាសន្នថ្នាក់ជាតិ ដេីម្បីទទួលថវិកាសម្រាប់កសាង កំពែងព្រំដែន
អាមេរិក ៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសដាក់ប្រទេសស្ថិតក្នុងភាពអាសន្នកំរិតថ្នាក់ជាតិ ដើម្បីទទួលបានថវិកាសម្រាប់ធ្វើការកសាងកំពែងព្រំដែន នៅតំបន់ភាគខាងត្បូង សហរដ្ឋអាមេរិក ដែលសភាមិនផ្តល់ឲ្យលោក។ នេះបើយោងតាមសារព័ត៌មាន New York Post។
ចំណាត់ការនេះជាសារបញ្ជាក់យ៉ាងច្បាស់មួយទៅកាន់ក្រុមស្តាំរបស់លោកថា លោកកំពុងព្យាយាមធ្វើឲ្យដូចការសន្យាក្នុងពេលបោះឆ្នោត និងក៏ជាសញ្ញាមួយបញ្ជាក់ថា អន្តោប្រវេសន៍ខុសច្បាប់ទំនងនៅតែជាចំណុចនយោបាយពិសេសមួយរហូតដល់ពេលធ្វើយុទ្ធនាការបោះឆ្នោតប្រធានាធិបតីឆ្នាំ២០២០។
ចំណាត់ការមិនធម្មតារបស់ត្រាំនឹងអាចឲ្យលោកឆ្លងផុតការជំទាស់របស់សភា និងបង្គាប់បញ្ជាដកប្រាក់ពីមូលនិធិសហព័ន្ធដោយផ្ទាល់ រួមមានប្រាក់រាប់ពាន់លានពីថវិការបស់ក្រសួងការពារជាតិ ដើម្បីសង់របង។
ត្រាំបានប្រាប់អ្នកយកព័ត៌មាននៅសេតវិមានថា« យើងនឹងប្រឈមវិបត្តិសន្តិសុខជាតិនៅព្រំដែនខាងត្បូងរបស់យើង និងយើងនឹងចាត់ការវាតាមផ្លូវណាមួយ។ខ្ញុំនឹងចុះហត្ថលេខាប្រកាសស្ថានភាពគ្រាអាសន្នជាតិមួយ។យើងនិយាយអំពីការចូលឈ្លានពានប្រទេសរបស់យើង ដោយថ្នាំញៀន និងការជួញដូររត់ពន្ធមនុស្ស ហើយនឹងឧក្រិដ្ឋជនគ្រប់ប្រភេទ»។
ការសំរេចចិត្តរបស់ត្រាំក្នុងការប្រើអំណាចគ្រាអាសន្ននេះ កើតឡើងបន្ទាប់ពីការប្រទាញប្រទង់គ្នាជាមួយពួកប្រជាធិបតេយ្យ ដែលរារាំងសំណើសុំប្រាក់ជាង៥ពាន់លានដុល្លារសំរាប់សង់របងព្រំដែនខាងត្បូងនេះ ដែលបាននាំដល់ការបិទរដ្ឋាភិបាល៣៥ថ្ងៃ។
គម្រោងប្រកាសដាក់ប្រទេសស្ថិតក្នុងភាពអាសន្នកំរិតថ្នាក់ជាតិ ដើម្បីកសាងកំពែងព្រំដែនរបស់លោក ដូណាល់ ត្រាំ ត្រូវបានក្រុមអ្នកគាំទ្រលទ្ធិប្រជាធិបតេយ្យ ប្តេជ្ញាក្នុងការប្រយុទ្ធប្រឆាំង នឹងសកម្មភាពនេះ។ នៅក្នុងសេចក្តីថ្លែងការណ៍រួមគ្នាមួយ, អ្នកស្រី ប៉េឡូស៊ី (Pelosi) ប្រធានសភា និងលោក ស៊ូមើ (Schumer) សមាជិកព្រឹទ្ធសភា សហរដ្ឋអាមេរិក បានលើកឡើងថា ការប្រកាសរបស់លោក ត្រាំ គឺជាទង្វើមិនស្របច្បាប់ដោយរំលោភបំពានយ៉ាងធ្ងន់ធ្ងរ ទៅលើអំណាចរបស់ប្រធានាធិបតី និងការព្យាយាមបំផ្លិចបំផ្លាញ «ពីការបរាជ័យរបស់លោកត្រាំ» ដើម្បីបង្ខំឲ្យម៉ិកស៊ិក បង់ប្រាក់កសាងកំពែង ដូចដែលលោក ត្រាំ បានសន្យាអស់រយៈពេលជាច្រើនឆ្នាំ៕
