សេចក្តីបំភ្លឺជូន អ្នកសារព័ត៌មាននិងសាធារ ណ ជន ពីករណីប្រមូលគ្នាជល់មាន់នៅភូមិសាស្រ្តស្រុកសង្កែ ខេត្តបាត់ដំបង
ក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបងមានកិត្តិយសសូមជម្រាបជូនសាធារណ ជនពិសេស អ្នកសារព័ត៌មាននិងបងប្អូនដែលនិយមប្រើប្រាស់បណ្តាញសង្គមបានជ្រាបថា កាលថ្ងៃទី ២៩ ខែ កញ្ញា ឆ្នាំ២០២០ ក្រុមការងារបានទទួលព័ត៌មានពីករណីប្រមូលផ្តុំគ្នាជល់មាន់នៅចំណុចដីចំការក្នុងភូមិស្ពង់ ឃុំអន្លង់វិល ស្រុក សង្កែ ខេត្តបាត់ដំបង ពីបងប្អូនសារព័ត៌មាន ។
ទទួលបានព័ត៌មាននេះក្រុមការងារបានរាយការណ៍ភ្លាមជូន ថ្នាក់ដឹកនាំស្នងការហើយថ្នាក់ដឹកនាំលោកបានបញ្ជាទៅអធិការនគរបាលស្រុកសង្កែឱ្យពិនិត្យបញ្ហានេះជាបន្ទាន់ ក្នុងករណីមានការប្រមូលផ្តុំគ្នាជល់មាន់ ដូចប្រភព ដែលផ្តល់ជូន ត្រូវចាត់វិធានការបង្រ្កាបភ្លាមៗ ។ លោកអធិការនគរបាលស្រុកបានទទួលបទបញ្ជានេះ ហើយបានចាត់វិធានការភ្លាមៗ តែពេលចុះទៅដល់ចំណុចខាងលើ ក្រុមអ្នកប្រព្រឹត្តិបានបែកខ្ញែកគ្នាអស់ទៅ ។
ទោះជាយ៉ាងនេះក្តីលោកអធិការនគរបាលស្រុកបានបញ្ជាក់ថា ចំណុចខាងលើពិតជាមានការប្រមូលផ្តុំ ជល់មាន់ប្រាដកមែន ហើយនៅថ្ងៃទី ០១ ខែ តុលា ឆ្នាំ ២០២០ សមត្ថកិច្ចនគរបាលនៃអធិការដ្ឋាន នគរបាលស្រុកសង្កែ បានកោះហៅអ្នកប្រព្រឹត្តិមកធ្វើការសាកសួរនិងធ្វើកិច្ចសន្យានៅចំពោះមុខសមត្ថកិច្ចឱ្យឈប់ប្រព្រឹត្តិបន្តទៀតរួចហើយ ។
នៅព្រឹកថ្ងៃទី ០២ ខែ តុលាឆ្នាំ ២០២០ នេះលោកឧត្តមសេនីយ៍ត្រីស្នងការបានចាត់បញ្ជាឱ្យលោកវរសេនីយ៍ឯក លឹម ពុទ្ធីឡា ស្នងការរងទទួលផែនការងារនគរបាលព្រហ្មទ័ណ្ឌ ចុះទៅដល់ចំណុចនោះ បន្ថែមទៀត ដើម្បីអញ្ជើញម្ចាស់ដីចំការដែលផ្តល់ឱកាសឱ្យមានការប្រព្រឹត្តិល្បែងជល់មាន់នេះ មកធ្វើកិច្ចសន្យា អប់រំ ណែនាំឱ្យឈប់ផ្តល់ទីកន្លែងនេះថែមទៀត។
ក្នុងនាមថ្នាក់ដឹកនាំស្នងការនៃស្នងការដ្ឋាននគរបាលខេត្តបាត់ដំបង សូមគោរពថ្លែងអំណរគុណយ៉ាងជ្រាលជ្រៅចំពោះអ្នកសារព័ត៌មាន រួមជាមួយមហាជនដែលបានចូលរួមផ្តល់នូវព័ត៌មានចំពោះករណីខាងលើ ក៏ដូចករណីផ្សេងៗទៀត មកដល់ស្នងការដ្ឋាន ហេីយគ្រប់ករណីទាំងអស់ថ្នាក់ដឹកនាំបានទទួលយកមកពិនិត្យនិងចាត់វិធានការដោះស្រាយដោយពុំបានព្រងេីយកន្តេីយឡេីយ ។
ដូចខ្លឹមសារបានជម្រាបជូនខាងលេី សូមអ្នកសារព័ត៌មានននិងមហាជនមេត្តាជ្រាប ជាមួយគ្នានេះសង្ឃឹមនិងជឿជាក់ថា អ្នកសារព័ត៌មានរួមទាំងមហាជនលោកបន្តចូលរួមសហការណ៍ជាមួយសមត្ថកិច្ចនគរបាល ជាបន្តទៀតដើម្បីសុខសុវត្ថិភាពក្នុងមូលដ្ឋានភូមិ ឃុំ ដោយភាតរភាពបំផុត សូមអរគុណ៕
