រាជរដ្ឋាភិបាលចេញ អនុក្រឹត្យស្តីពី ការចេញផ្សាយធនប័ត្រអនុស្សាវរីយ៍ ប្រភេទ ១៥០០០ រៀល
(ភ្នំពេញ)៖ យោយទៅតាមអនុក្រឹត្យស្តីពីការចេញផ្សាយធនប័ត្រអនុស្សាវរីយ៍ ប្រភេទ ១៥០០០ រៀលមួយ ចុះថ្ងៃទី៧ ខែតុលា ឆ្នាំ២០១៩នេះ បានអនុញ្ញាតឲ្យចេញផ្សាយ ធ្វើចរាចរ និងប្រើប្រាស់ក្នុងទូទាំងព្រះរាជាណាចក្រកម្ពុជានូវ ធនប័ត្រអនុស្សាវរីយ៍ ប្រភេទ ១៥០០០ រៀល ទន្ទឹមនឹងបណ្តាញប្រភេទប្រាក់ដែលត្រូវបានចេញផ្សាយរួច។
តាមអនុក្រឹត្យខាងលើ ធនាគារជាតិនៃកម្ពុជាមានភារកិច្ចចេញសេចក្តីប្រកាស ដើម្បីផ្សព្វផ្សាយពីលក្ខណៈសម្គាល់ នៃធនប័ត្រអនុស្សាវរីយ៍ ប្រភេទ ១៥០០០ រៀលនោះ។
ដោយឡែករដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី អគ្គទេសាភិបាលធនាគារជាតិនៃកម្ពុជា រដ្ឋមន្ត្រី រដ្ឋលេខាធិខាគ្រប់គ្រងក្រសួង-ស្ថាប័ន និងអភិបាលរាជធានី-ខេត្ត ត្រូវទទួលបន្ទុកអនុវត្តអនុក្រឹត្យតាមភារកិច្ចរៀងៗខ្លួន ចាប់ពីថ្ងៃចុះហត្ថលេខានេះតទៅ។
គួរម្លឹកផងដែរថា ក្រដាសប្រាក់គំរូថ្មី១៥០០០រៀល ធ្វើឡើងនៅព្រឹកថ្ងៃទី០៣ ខែតុលា ឆ្នាំ២០១៩ ក្នុងឱកាសព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុជា និងសម្តេច ព្រះមហាក្សត្រី នរោត្តម មុនិនាថ សីហនុ ព្រះវររាជ មាតាជាតិខ្មែរ សព្វព្រះរាជហឬទ័យប្រោសព្រះរាជានុញ្ញាតឲ្យសម្តេចតេជោ ហ៊ុន សែន និង លោក ជា ចាន់តូ អគ្គទេសាភិបាលធនាគារជាតិនៃកម្ពុជា ចូលក្រាបថ្វាយបង្គំគាល់ នៅព្រះមហាប្រាសាទខេមរិន្ទ ក្នុងព្រះបរមរាជវាងំ។ នេះបើតាមការចុះផ្សាយ របស់ទូរទស្សន៍ជាតិនៃកម្ពុជា។
សម្តេចតេជោ បាននាំយកក្រដាសប្រាក់ថ្មី ប្រភេទ១៥០០០រៀល (មួយមុឺនប្រាំពាន់រៀល) និងកាក់មាសមានរូបព្រះឆាយាលក្ខ័ណ៍ព្រះបរមរនកោដ្ឋ សម្តេចព្រះមហាក្សត្រីនិង ព្រះមហាក្សត្រ ថ្វាយសម្តេចព្រះមហាក្សត្រី ដើម្បីអបអរសាទរខួបគ្រងព្រះបរមសិរីរាជសម្បត្តិគម្រប់១៥ព្រះវស្សា របស់ព្រះមហាក្សត្រកម្ពុជា៕